Notadong pusher natiklo

CEBU, Philippines - Usa ka notadong drug pusher nasikop sa kapolisan nga sakop sa Provincial Anti-Illegal Drugs Special Operation Task Group (PAIDSOGT) ug Philippine Drug Enfrocement Agency (PDEA) didto sa sitio Lacaron, barangay Pitalo, lungsod sa San Fernando sa miaging gabii.

Ang nasikop mao si Lester Sabayton Manloloyo, 31, kinsa daan nang anaa sa listahan sa Cebu Provincial Police Office.

Ang pagsikop sa suspetsado nahimo dihang ang PAIDSOTG ug PDEA misilbi sa search warrant nga giluwat ni RTC Branch 10 Judge Soliver Perras batok sa suspetsado.

Sa didto na ang kapolisan sa balay sa suspetsado naka-alinggat kini nga may mga polis busa mikabad kini og dagan uban sa laing duha ka tawo diin ang usa nailhang si Joseph “Bulljack” Paradela, samtang ang usa wala hiilhi.

Busa gigukod kini sa kapolisan ug naapsan niini ang suspetsado ug nadakpan gyud apan ang iyang duha ka kauban nakaikyas sa hingpit.

Didto sa balay sa suspetsado nakuha sa kapolisan ang usa ka medium pack sa shabu nga nagkantidad og di mominos P20 mil ngadto sa P30 mil , laing duha ka gagmayng pakite nga gibana-banang nagkantidad og P500.

Laing nakuha usab sa kapolisan mao ang usa ka plastic nga gibana-banang nagkantidad og P15 ug ang tanang nasakmit nga shabu mikabat og mga P40 mil.

Nasayran sa kapolisan nga notado nang drug pusher ang suspetsado sa ilang lugar ug gani nabalhug na kini sa prisohan og duha ka tuig gumikan sa maong kaso.

Si SPO4 Fernand Navales mitug-an usab napiang siya sa pagginukod nila sa suspetsado.

Nasayran usab nga ang suspetsado makaariya og shabu nga dili mominus 100 gramos nga mokantidad og P55 mil matag semana. (BANAT NEWS)