CEBU, Philippines - Human sa grabeng baha tungod sa sunod-sunod nga pagbunok sa uwan nga nakaapektar sa mga lugar sa dakbayan sa Talisay ang Konseho sa siyudad nagplanong ipahunong na ang paggamit og plastic bags.
Kini sama sa gihimo sa konseho sa dakbayan sa Mandaue nga hingpit nang nagdili sa mga tindahan sa paggamit og plastic bags sa ilang mga produkto tungod gihapon sa maong hinungdan.
Ang Talisay City Engineering Office nga maoy mag-inspeksyon sa mga kanal nakabantay nga nabarado kini tungod sa mga plastik hinungdan nga ang tubig miawas diha sa kadalanan.
Ang plastic dili malata o madugta ug kung magtipun-og kini sa agianan sa tubig kini maoy hinungdan sa pag-awas.
Si Konsehal Rodolfo Cabigas kinsa chairman sa committee on infrastructure nagkanayon nga gitun-an nila karon ang lakang nga ilang himuon kabahin sa pagdili sa shopping mall, kamerkadohan ug tanang convenience store sa Talisay sa pagdili og gamit og mga plastic bag.
Karong adlawa gikatakda ang mga konsehal uban kang Bise Mayor Alan Bucao nga magtigom alang sa ordinansang himuon alang sa nahisgutang katuyoan.
Si Cabigas mipasabot nga ang ipasar unya nga ordinansahon dili kini mapatuman dayon tungod kay ikonsulta usab nila kini ngadto sa ubang mga sektor sama sa mga tagdumala sa shopping malls, supplier sa mga plastik ug ubang mga hingtungdan.
Apan iyahang gipasalig nga kung makompleto na nila ang tanang detalye sa ipasar nga ordinansahon ug sa ilang pagtuon niini mopatawag dayon sila og public hearing.
Si Konsehal Nida Cabrera, tsirman sa committee on environment sa konseho sa dakbayan sa Sugbu midayeg sa gihimo sa dakbayan sa Mandaue ug Talisay, apan lahi ang iyang sugyot alang sa dakbayan.
Matud pa niya nga mas maayong ang publiko magdala nalang og kaugalingong sudlanan kung moadto sa mga tindahan ug kinahanglang mahimo silang responsable sa kinaiyahan nga di magpataka’g labay og plastic.
Plano niyang mohimo og ordinansang kinahanglang pabayran sa mga malls, tindahan ug uban pa ang plastic bags ngadto sa ilang kostumer, sa pagkakaron libre ang plastic bags sa mamalitay. (Brenda Batuto ug Sande Anadia) (BANAT NEWS)