Tulisan gipasakaan na'g kaso

CEBU, Philippines - Pormal nang gipasakaan og kasong robbery with frustrated homicide ang mga suspetsadong mitulis sa mga pasahero sa jeep nga pasaheroan sa miaging adlaw sa taytayan sa Mananga, barangay Tabunok, dakbayan sa Talisay.

Ang mga suspetsado mao si Rolando Sanchez kinsa napusilan atol sa pagpanulis, Juanito Belamia, ug Reymart Roxas kinsa nakaikyas uban   sa usa ka 17-anyos nga bayong-bayong.

Ang nahisgutang bayong-bayong matud ni PO3 Arnold Damasco sa Talisay City Police Station nga nadakpan na niya   kaniadto tungod kay nangawat ug magpunay lang og pangangkon nga menor de edad pa siya apan walay gikapakitang birth certificate unya giingong mag-alyas-alyas usab kini og mga ngalan.

Kahinumdoman nga sila si Ma. Teresa Alferez Arriesfado, Dorie June Hereysa, Azineth Anastacio, Mercy Gorre ug Edgar Escarlan, mga pasahero sa PUJ dihang gitulis kini sa grupo ni Sanchez sa may taytayan sa Mananga.

Ang grupo ni Sanchez giingong mipara sa gisakyan sa mga biktima ug dayong ti-on sa armas ug kuha sa mga personal nga mga butang sa mga biktima.

Apan si Anastacio gitamparos og pusil sa walang aping sa usa sa mga tulisan tungod kay nagdumili siya og hatag sa iyang shoulder bag. (BANAT NEWS)