Lodging house natulisa'g P6mil

CEBU, Philippines - Milampos ang duha ka armadong tulisan sa pagsakiyo sa P6 mil nga natulis nila gikan sa usa ka lodging house sa Barangay Guizo, dakbayan sa Mandaue kagahapon sa kadlawon.

Ang biktima mao ang Hidden Lodge nga nahimutang sa maong dapit ug gipanag-iya ni Henson Go.

Sa imbestigasyon sa kapolisan sa Station 1 sa Mandaue City Police Office nasuta nga ang duha ka tulisan kalit lang misulod sa lodging house dayong lanit sa ilang armas ug mideklarar nga tulis.

Si Adeline Melicio, 29, dalaga nga maoy kahera nagkanayon nga gumikan sa kakuyaw niyang pabuthon sa mga tulisan ang ilang mga armas kansang sumbohan gidul-it sa iyang dagway, napugos siya sa pagtunol sa P6 mil nga iyang koleksyon niadtong higayona.

Giangkon ni Melicio nga walay security guard ang ilang buhatan apan may gipabantay silang tawo sa gawas nga walay armas.

Nasuta usab sa kapolisan nga gawas nga walay sikyu, wala usay CCTV camera ang maong establishmento hinungdan nga walay nakaila sa maong mga tulisan.

Padayon pang gipangita sa kapolisan ang mga tulisan. (BANAT NEWS)