Na-missing sa dagat gisalbar sa mananagat

CEBU, Philippines - Swerteng naluwas ang usa ka pamilyahan sa na-missing nga pumpboat nga gikan sa lalawigan sa Bohol nga paingon mobalik dinhi sa Sugbo nga nadala sa kusog nga hangin ug dagkung bawod sa kadagatan sa Naga dihang nabangalan sa usa ka mananagat nga taga dakbayan sa Talisay niadtong milabay’ng buntag.

Base sa report sa DyAB Abante Pa Bisaya ang nahisgutang mananagat mao si Crisencio Tañan, 40, taga sitio Lawis, barangay Langtad, dakbayan sa Naga.

Ang mga giluwas ni Tañan mao sila si Allan Miraña, 55, Jacinto Miraña, 55, Charles Baldo ug Steven Campo, 30, pulos mga residente diha sa sitio Atisan, barangay Cansojong, dakbayan sa Talisay.

Si Doren Celocia, clerk sa barangay hall sa Cansojong nga nahinabi sa Banat News kagahapon nagkanayon nga niadtong Huwebes sa buntag migikan ang pamilya sa Talisay padulong maghatud og lubong sa namatay’ng kabanay sa Gapasan, Tubigon, Bohol.

Apan nakadawat og impormasyon ang mga paryente sa upat diha sa Cansojong, Talisay gikan sa ilang mga paryente sa Bohol nga ang upat mibalik dayon pagkahuman og hatud sa patay apan milawom na ang kagabhion wala pa gihapon sila maabot hinungdan nga midangop sila sa kapolisan.

Nasuta nga napagngan og makina ang gisakyan sa upat tunga-tunga sa kadagatan sa Bohol ug Cebu human hapaka og dagkong bawod ug wala na moandar og balik maong nagpautaw-utaw na lang sila diha sa dagat hangtud nga naabot sila sa kalawran sa Naga.

Ang upat nanawag og panabang sa unang mananagat nga ilahang nakit-an apan igo lang silang giduol ug wala tabangi tungod kay managat pa kini.

Sunod nilang nakit-an si Tañan kinsa wala magpanuko pagduol ug miboluntaryong guroyon sila paingon ngadto sa Cansojong, Talisay.

Ang upat nagkuray na sa katugnaw ug kagutom dihang nabangalan ni Tañan.

Si Tañan giingong taud-taud na kining nagmulo sa gihambin nga sakit sa tiyan apan niadtong higayona mipugos lang gyud kini og panagat tungod kay mao ra kini ilang panginabuhian.

Tungod sa gibuhat ni Tañan, ang kagamhanan sa dakbayan sa Talisay gikatakdang mopasidungog kaniya. Si Bise Mayor Alan Bucao misugo sa iyang staff pag-adto sa gipuy-an sa nahisgutang mananagat aron masusi ang kahimtang niini sa pagpuyo ug mahatagan kini og panabang.

Si Kagawad Ferdie Rabaya sa Cansojong nagpatawag usab dayon og tigom kagahapon sa buntag diin ilahang gihisgutan ang kabahin sa mahatag nilang tabang ngadto kang Tañan isip ilang dakung pasalamat sa pagluwas sa ilang mga residente. (BANAT NEWS)