Pasahero gitulis sa nagmotor

CEBU, Philippines - Nawad-an sa iyang salapi, cell phone ug duha ka tseke ang usa ka babaye dihang gitulis sa wala hiilhing armadong lalaki sulod sa giluwanan niining PUJ sa dalan S.B. Cabahug sa barangay Ibabao, dakbayan sa Mandaue sa miaging hapon.

Ang biktima mao si Florida Quimada, 26, nga taga Dunggoan sa barangay Basak, sa maong dakbayan ug ang nagtulis mao ang usa ka tawo nga bag-o lang misakay sa maong jeep gikan sa giluwanan niining motorsiklo nga gimaneho sa iyang kauban.

Si PO1 Jesson Estrera sa kapolisan sa maong dakbayan nga nahinabi sa Banat News miingon nga nagsakay ang biktima sa PUJ gikan sa highway sa maong dakbayan.

Samtang nagdagan kini paingon sa barangay Ibabao, may usa ka motorsiklo nga giluwanan sa duha ka tawo nga kalit lang mi-overtake sa PUJ nga gisakyan sa biktima.

Unya dihang mihunong ang PUJ mibalhin usab og sakay niini ang usa ka tawo nga nag-angkas sa motorsiklo.

Dugang pa ni PO1 Estrera nga dihang nakalingkod na ang tulisan sulod sa jeep tupad sa biktima, kalit kining milanit sa iyang gitangkil nga kutsilyo ug gition ngadto sa biktima uban sa pagdeklarar nga tulis.

Ang biktima nga nabalaka sa iyang kinabuhi wala na mosuki dihang gisakmit sa tulisan ang iyang shoulder bag nga gisudlan sa duha ka mga tseke nga balor og P20 mil, cash nga P1,500 ug cell phone nga nagkantidad og P3 mil.

Human masakiyo ang bag, nanaog dayon ang tulisan ug miangkas og balik ngadto sa motorsiklo nga nagsunod kaniya.

Gisuta pa karon sa kapolisan kun dili ba kakonsabo sa tulisan ang drayber sa PUJ nga gisakyan sa biktima. (BANAT NEWS)