Talisay gilunopan sa baha

CEBU, Philippines - Sa ka kusog sa uwan sa miaging Miyerkules sa buntag ang mga ubos nga bahin nga kabarangayan sa dakbayan sa Talisay gisanapan sa tubig ug gibasol sa apektadong mga molupyo ang kagamhanan sa siyudad tungod sa kapakyas nila pagsulbad niining karaan na kaayong problemaSa sitio Palanggana, barangay San Roque, taga tuhod ang tubig ug tagahawak sa mga sudlonong bahin sa maong lugar.

Si Desiree Claro nga taga Palanggana mibutyag nga ang maong problema diha na sa maong lugar sukad niadtong 1995 sa iyang pagpuyo sa maong dapit ug dugay na kaayo nilang giantos ang maong suliran apan wala gyuy aksyon ang mga opisyal sa barangay.

Samtang si Armand Abaquita, 47, nga nagpuyo duol sa gamay’ng sapa sa barangay Cansojong nagkanayon nga nangandoy sila nga unta tabunan sa siyudad ang gamay’ng bahin sa maong creek ilabi na ang anaa sa siot nga agianan.

Matud niya nga daghan na sa ilang mga silingan ang nahagbong diha sa creek tungod kay dili na makita ang agianan sa tawo kung mobaha. 

Gawas sa maong lugar ang sitio Tangub sa barangay Lagtang gidahilian usab og mga bato gikan sa ibabaw’ng bahin apan wala hinuoy naangol sa maong hitabo.

Apan namatikdan sa mga tigpaniid nga pakamatyan sa mga molupyo ang maong lugar kay bisan kun maligsan pa og bato ang ilang balay dili gyud sila mobiya niini ug andam sila sa paghalad sa ilang kinabuhi.

Sa barangay San Isidro ang dalan natabonan usab sa tubig lakip na ang ilang mga tugkaran nga susama na sa lunangan.

Sa barangay Poblacion atubangan sa Talisay City College ang wanang atubangan sa maong tunghaan nasama og swimming pool tungod sa baha.

Apan gumikan sa ka walay kuwarta sa dakbayan wala gyuy ikapaayo sa mga imbornal sa maong mga lugar nga lunopanan. (BANAT NEWS)