Milugos sa humabdos priso

CEBU, Philippines - Napaslak sa prisohan ang usa ka tawo nga nasikop sa kapolisan gumikan sa giingong paglugos niini sa 21 anyos nga dalaga didto sa Purok 7 sa barangay Cubacub, dakbayan sa Mandaue sa miaging adlaw.

Ang suspetsado mao si Jimmy Pitaluna, 54, ug kapuyo sa inahan sa gilugos nga biktima.

Si Inspector Ramil Morpos sa Investigation Detection and Management Bureau (IDMB) sa kapolisan sa maong dakbayan miingon nga ang biktima nga gikuyogan sa inahan sa pagtaho sa ilang buhatan miasoy nga samtang nagsakay siya sa ilang sakyanan gikan sa tulunghaan gipasulod kuno sa suspetsado ang tudlo niini sa iyang (biktima) kinatawo.

Unya sa pag-abot nila sa balay , labing mikiat ang kamot sa suspetsado sa paghinol sa tanang bahin sa iyang lawas ilabi na nga walay laing tawo sa balay kay wala didto ang iyang inahan ug milampos gyud kini sa pagpakighilawas kaniya.

Unya dihang misumbong ang biktima sa iyang inahan, misibat dayon ang suspetsado apan sa gihimong hot pursuit operation nila ni Inspector Morpos nadakpan nila ang suspetsado busa gihansak dayon kini sa prisohan.

Dugang nasayran gikan sa IDMB kagahapon nga ang women section sa Mandaue City Police Office (MCPO) may kaso nang nasang-at ngadto sa hukmanan batok sa suspetsado.

Kini sa dihang nasuta nga positibong nakuha sa suspetsado ang pagkababaye sa biktima sumala sa resulta sa eksaminasyon sa doctor nga mihiling sa kinatawo niini. (BANAT NEWS)