Dalaga gilugos sa NPA nga tiyo

CEBU, Philippines - Usa ka 17 anyos nga dalagita giunay paglugos sa nagpaka-aron ingnong NPA niyang uyoan sa gawas sa ilang balay sa barangay Langtad, sa lungsod sa Naga sa miaging Huwebes sa kaadlawon.

Si Elen, 17, dili tinuod niyang ngalan maoy misumbong sa kapolisan sa Naga Police Station nianang pagka Huwebes sa buntag bahin sa nahitabo kaniya.

Si PO2 Maricor Aliganga sa Womens Desk sa Naga Police station nga nahinabi sa Banat News mibutyag nga sumala sa biktima nga niadtong Miyerkules sa kaadlawon samtang siya natulog kalit lang siya gisaka sa usa ka lalaking nag-bonnet sa nawong.

Ang suspek nagpaila sa biktima nga usa siya ka sakop sa New Peoples Army (NPA) ug gimandoan ang biktima nga dili siya pasyagiton ug dili usab pa-istoryahon ni bisan kinsa ug gimanduan siya niini nga pagawason sa ilang balay.

Samtang didto na sa gawas ang biktima, gimanduan siya sa suspek nga pahubuon sa sapot dayon gipahimuslan ang iyang pagkababaye niini.

Matud ni Aliganga nga wala gyud makaila ang biktima sa milugos kaniya, apan sa tanto niining paghuna-huna nahinumdoman niini ang pamayhon sa suspek nga iya ra sab diay’ng uyoan nga si Fortunato Lapiz, 56, silingan sa biktima.

“Kining balay sa suspek adunay puso unya anha man manglaba ang biktima, ang agtang sa suspek maoy nailhan sa biktima ug ang pamayhon niini,” ingon pa ni Aliganga kinsa midugang nga ang biktima ug ang inahan ra maoy nangatulog sa ilang balay kay ang iyang amahan atua man sa laing nasud magtrabaho.

Daling giadto ni Sr. Insp. Rolando Eballe ang balay sa suspek ug dali kaayo kining nasikop ug gidala sa police station.

Matud ni Aliganga nga positibo gyud nga giila sa biktima ang suspek nga milugos kaniya apan hugtanong gihimakak sa suspek ang pasangil.

Positibo usab ang resulta sa eksaminasyon sa Pink Room sa Vicente Sotto sa kinatawo sa biktima nga nagisian gyud agi sa kinatawo sa lalaki.

Matud ni Aliganga nga kagahapon sa ala 1:00 sa hapon pormal na gipasaka nila ang kasong pagpanglugos ngadto sa sala ni Piskal Napoleon Alburo sa dakbayan sa Naga.  (BANAT NEWS)