Sakop sa Crips gang gipatay

CEBU, Philippines - Nabuslot ang ulo ug namatay ang   usa ka 21 anyos nga giingong sakop sa Crips gang human kini pusila sa wala hiilhing kriminal didto sa dalan P. Basubas sa barangay Tipolo, dakbayan sa Mandaue sa miaging gabii.

Ang biktima mao si Luthier Tarriman Macacero, ulitawo nga taga sitio Camanggahan sa barangay Tabok sa maong dakbayan kinsa giingong kanhi sakop sa Crips gang sa maong lugar.

Si SPO2 Antolin Montecalvo sa kapolisan sa Presinto 2 sa barangay Subangdaku sa maong dakbayan nga nahinabi sa Banat News miingon nga kuyog sa biktima ang iyang mga barkada sa maong dapit aron sila mangaon.

Dugang pa niya nga sumala sa mga barkada sa namatay nga ilang gisukitsukit nga nakurat silang tanan dihang kalit lang nabati nila ang sunodsunod nga mga boto sa armas de fuego nga wala matino ang kalibre.

Unya dihadiha kalit lang nahagba sa yuta ang biktima kansang ulo gilapsan sa duha ka mga bala. Dali nga gidala ang biktima sa Mandaue City District Hospital apan gideklarar sa mga doktor sa maong tambalanan nga dead on arrival kini. (BANAT NEWS)