CEBU, Philippines - Ang giilang Spiderman nga si Jecy Mollena, 20 , kinsa mikatkat sa tower sa Marcelo Fernan Bridge (MFB) sa miaging semana ug gipasakaan og kaso sa kapolisan nga alarm scandal ug illegal nga paghupot og hinagiban nga makamatay, gipagawas na gikan sa bilanggoan sa miaging Martes.
Si Inspector Winston Penaranda, hepe sa Investigation Detection and Management Bureau (IDMB) nga nahinabi sa Banat News miingon nga naulahi na ang kaso nga special malicious mischief nga gisang-at sa Department of Public Works and Highways (DPWH) batok kang Mollena, kay naabtan na sa oras sa pagpagawas niini. Matud pa ni Inspector Penaranda nga Miyerkules na sa buntag napasaka ang kaso ngadto sa piskalya ug hayan nga dakpon nila og usab si Mollena sa higayon nga moluwat og warrant of arrest ang korte batok niini.
Gipasabot ni Inspector Penaranda nga gipasaka ang maong kaso sa DPWH human masuta nga si Mollena ang nakamugna og kadaot sa MFB dihang mikatkat kini sa tower sa maong taytayan nga nakapaalarma sa kapolisan sulod sa kapin 59 oras nga gidugayon.
Matud pa ni Inspector Penaranda nga gikuha sa iyang iyaan si Mollena ug gidala sa gipuy-an niini sa barangay Basak sa lungsod sa Catmon ug inigpauli sa iyang iyaan ngadto sa Bukidnon dad-on niini si Mollena.
Sa sayo pa daan nang gibutyag sa maong iyaan nga si Mollena liso og pangisip- nga sama usab sa inahan niini nga tua sa Bukidnon. (BANAT NEWS)