Talisay kuwang og polis

CEBU, Philippines - Ang ka kuwang sa mga polis sa dakbayan sa Talisay maoy usa sa hinungdan nga wala madayon ang planong pagbutang og sub-station sa sitio Mananga, barangay Tabunok sa maong dakbayan.

Mao kini gibutyag ni Supt.Henry Biñas, hepe sa Talisay City Police Station (TCPS) nga nahinabi sa Banat News kagahapon kinsa nagkanayon nga maglisud sila og mentinar kung modugang og    sub-station sa Mananga tungod sa ka kuwang sa iyang mga personnel.

Gani matud pa niya nga sukad kuhaa ang mga Field Training Police (FTP) gikan sa Talisay, ang mga organic nga polis sa TCPS magkapuliki na sa ilang mga gimbuhaton sama sa pagtubag sa mga alarma nga usahay magkadungan-dungan, pagpatrolya sa kadalanan, ug sa pagpahigayon og imbestigasyon sa mga mahitabong insidente.

Matud pa ni Biñas nga sa pagkasikop sa usa ka suspetsadong tulisan nga si Rolando Sanchez ug sa giingong mga kauban niining si Juanito Belamia ug usa ka menor de edad, gilauman niyang magpanagana na usab ang ubang mga badlongon sa paghimo og mga binuang sa Talisay.

Sa wala pa i-pull-out ang mga FTP kanunay’ng adunay idestinong polis sa Mananga nga magpuli-puli og bantay hinungdan nga menos ang mga insidente sa tulis sa maong lugar niadtong mga higayona.

Kahinumdoman nga ang mga biktima sa grupo ni Sanchez nagkanayon nga nakakita sila og usa ka tawo nga nagsul-ob og jacket nga maoy miluthang sa suspetsado dihang gitulis sila niini, ug human sa maong pagpamusil dali kining mibiya sa lugar.

Matud ni Biñas nga posibleng ang maong tawo nagpakabana lang usab ug naglagot sa mga tulisan.

Hinuon si Biñas walay pagtuo nga usa ka vigilante ang mipusil kang Sanchez kundi usa lang kadto ka tawo nga nagpakabana batok sa mga tulisan.

Ang hepe midugang nga adunay mga molupyo nga usahay mo-report ngadto kanila bahin sa mga ilegal nga nahitabo sa ilang mga lugar apan kasagaran walay pakabana ilabi na sa panahon nga ila kining imbestigahon kay inigpangutana nila magpunay lang og pangambot. (BANAT NEWS)