Giluba, gipusil kritikal

CEBU, Philippines - Kritikal ang kondisyon sa usa ka lalaki human kini lubaa ug pusila sa duha ka tawo tungod sa personal nga bangi didto sa sitio Guiwanon, barangay Poblacion, lungsod sa Dalaguete sa miaging hapon.

Ang biktima mao si Condrado Salonoy, 30,taga barangay Consolacion sa nahisgutang lungsod samtang ang suspetsado mao si Virgilio Lajos Jr., hingkod , nga silingan ra sa biktima, uban sa wala hiilhing kauban niini.

Base sa imbestigasyon sa kapolisan nga si Salonoy nagsakay og traysikol gikan sa barangay Poblacion paingon nang mopauli dihang gipara ang traysikol nga iyang gisakyan ni Lajos ug sa kauban niini.

Samtang ang biktima naglingkod sa likod sa drayber sa traysikol, gikalitan lang og duslak sa kutsilyo ni Lajos samtang ang kauban niini maoy miluthang kaniya.

Hinuon bisan samdan sa dinunggaban ug pinusilan nakaambak pa sa traysikol ug nakadagan pa ang biktima ngadto sa police station. Gihatod dayon kini ngadto sa tambalanan sa dakbayan sa Sugbo ubos sa talandugong kahimtang.

Usa sa motibo nga gisubay sa kapolisan sa maong hitabo mao ang personal nga bangi samtang padayon pa nilang gipangita ang suspetsado ug ang kauban niini. - Brenda D. Batuto, Reina Vita Labang ug Maria Ana Carmela Estenor  (BANAT NEWS)