Climate Change Act angay tukion - Quisumbing

CEBU, Philippines - Si 6th district Congressman Gabriel Luis R. Quisumbing miawhag sa nasudnong kagamhanan uban ang nagkadaiyang mga ahensya   nga mopahigayon og asembliya aron tukion ang epektibong pagpatuman sa Republic Act kon RA 9729 o ang “The Climate Change Act.”

Kini aron ang gobyerno makatubag ug makahimo dayon og lakang bahin sa nag-usab-usab nga kahimtang sa panahon.

Si Quisumbing mipadayag sa iyang kabalaka gumikan niining pagpunay og ulan-ulan kay mosangpot man kini sa grabing baha ug pagdahili sa yuta sa nagkadaiyang probinsiya sa nasud sa Pilipinas ilabina dinhi sa lalawigan sa Sugbo.

Nasaksihan ni Quisumbing ang pagkatanggong sa daghang mga pasahero sa usa ka shuttle ferry nga mobiyahe unta paingon sa Camotes Island apan wala kini makalarga tungod sa dautang panahon.

“The National Disaster Risk Reduction Management Council (NDRRMC) should be ready to support urgent disaster risk reduction and management measures, in anticipation of disasters related to and aggravated by climate change,” sigun pa ni Quisumbing.

Midugang ang kongresista sa ika-unom nga distrito nga ang nasud angayan nga mosulod karon sa "season of climate-induced disasters" kun pagpugong nga dili dako ang trahedyang manghitabo tungod sa dautang panahon.

Matud pa ni Quisumbing nga ang Climate Change Commission nagkinahanglan og koordinasyon sa tanang mga ahensiya sa kagamhanan ilabina kun maghisgot og "disaster risk reduction and management plans."

Apan iyang gitataw nga importante karon ang pagpangita og tinubdan sa suporta gikan sa international ug nasudnon nga pundo.

Sa sayo pa, si Quisumbing miduso sa House Resolution 563 nga naghangyo sa House Committee on National Defense sa pagpahigayon og congressional inquiry, in aid of legislation, aron matarong sa pagpatuman ang Republic Act No. 9729, kon “The Climate Change Act of 2009”.

Ang tinguha ni Quisumbing nga aron hugtan sa gobyerno ang pagpatuman sa epektibong disaster risk reduction and management initiatives. - BANAT NEWS