Tanod naghikog tungod sa balatian

CEBU, Philippines - Patay na nga napalgan ang usa ka tanod kinsa giingong naghikog tungod sa gihambin nga balatian sa lawas niini didto sa barangay Ibo, dakbayan sa Toledo kagahapon sa buntag.

Ang maong tanod giila sa kapolisan nga si Venecio Bobilles, 50, nga taga Ibo.

Base sa imbestigasyon sa kapolisan nga niadtong Lunes sa gabii nakita si Bobilles sa iyang anak dalaga nga si Formisa, 19 nga miputol sa ilang nylon nga hayhayan nga gikutay sa likod sa ilang balay.

Matud ni Formisa nga ang iyang amahan nagmagul-anon tungod sa gihambin niining sakit nga scoliosis sa bukog niini sa iyang mga tiil.

Nasayran nga hilom nga gibitik ni Bobilles sa pisi ang iyang liog ug gigaid usab ang tumoy niini sa sagbayan sa ilang balay ug didto siya magbitay sa sulod sa iyang lawak. - BANAT NEWS