Lola way kaon gilunosan patay

CEBU, Philippines - Napalgang patay ang usa ka tigulang babaye nga paingon nang madugta ang lawas sulod sa gipuy-an niining payag nga gituohang gilunosan sa kagutom human biyai sa iyang bugtong anak lalaki.

Si Eulalia Tano, 75, biyuda, nga taga sitio Sangi sa barangay Poblacion lungsod sa Barili napalgan sa iyang silingan nga patay na niadtong Lunes sa hapon.

Si SPO2 Zaldy Orillo sa Barili Police Station mitug-an sa mga tigbalita nga usa ka Carlo Gimarangan, silingan sa biktima maoy nagpahibalo kanila human mapalgi niini ang patay’ng lawas ni Tano.

Sa gihimong pakisusi sa kapolisan sa lungsod, nagkanayon nga ilang gituohan nga mga upat ngadto sa lima na ka adlaw nga namatay ang biktima.

Matud ni Orillo nga sa miaging semana nakit-an si Tano sa iyang mga silingan nga kanunay lang mangayo og pagkaon sa iyang mga silingan.

Dugang pakisusi sa kapolisan nasayran nga may bugtong anak si Tano apan giingong milayas kini ug gibiyaan ang iyang inahan.

Gituohan sa kapolisan nga posibleng nagutman ang tigulang ug wala na makaantos ug namatay. - BANAT NEWS