'Tulisan' sa mananga gipusil human manulis

CEBU, Philippines - Usa ka suspetsadong tulisan napusilan human niini tulisa ang mga pasahero sa jeepney niadtong Lunes sa gabii ug kagahapon sa kaadlawon diha sa sitio Mananga, barangay Tabunok dakbayan sa Talisay.

Ang napusilan sa tuong bahin sa paa mao si Rolando Sanchez, taga sitio Mananga, Tabunok kinsa gidala sa iyang mga kauban nga sila si Juanito Belamia, 23, ug laing duha ka menor de edad nga nagpanuigon og 17-anyos ug 14-anyos ngadto sa Vicente Sotto Memorial Medical Center.

Atol sa follow-up operation sa kapolisan diha sa Mananga ang giingong laing kauban ni Sanchez nga si Reymart Roxas daling nakasibat apan ang silingan ni Roxas nga si Jerry Quiñones giimbitar sa mga polis ngadto sa Talisay City Police Station aron kini sukit-sukiton.

Si Ma. Teresa Alferez Arriesgado, 29, taga barangay Colon, Naga giingong nabiktima sa grupo ni Sanchez mga alas 11:45 sa gabii niadtong Lunes.

Nadala sa maong mga tulisan gikan kang Arriesgado ang usa ka Samsung cellphone, kwarta nga P3,000, PRC claim stub, ATM card, Company ID, passbook sa coop savings ug uban pang mga importanteng dokumento.

Mga alas 12:10 sa kaadlawon kagahapon gitulis sa grupo ni Sanchez sila si Dorie June Hereysa, hingkod ang panuigon, Azineth Anastacio, 25, taga dakbayan sa Naga, Mercy Gorre, taga barangay Tulay lungsod sa Minglanilla, ug Edgar Escarlan taga barangay Tuyan, Naga.

Si Anastacio miingon nga pag-abot nila diha sa Mananga tulo ka mga lalaki ang mipara ug kalit gitionan og armas ang drayber human niini gitiunan ang mga pasahero ug gipanguha ilang mga butang.

Human niini duna silay nakitang tawong nag-jacket nga kalit mipusil sa usa sa mga tulisan apan si Insp. Hugo Rio Ipong kinsa maoy nangulo sa gipahigayong follow-up operation mibutyag sa Banat News nga tinuod nga naigo si Sanchez apan gituohan nilang naunay kini sa iyang pusil o ba kaha sa iyang mga kauban.

Naabtan nila ngadto sa VSMMC si Belamia ug ang duha ka menor nga naghatud kang Sanchez ug na-recover diha ni Sanchez ang upat ka cellphone gikan sa 17-anyos.

Si Ipong nagkanayon nga si Roxas nakadagan dihang ilahang giadto sa gipuy-an niini diha ilawom sa tulay sa Mananga apan gidala nila ang silingan niining si Quiñones aron sukit-sukiton. - BANAT NEWS