CEBU, Philippines - Duha ka tawo ang gikatahong missing, usa niini usa ka 8-anyos nga bata ug liboang kabalayan ang gilunopan atol sa pagbunok sa kusog nga uwan kagahapon nga mimugna og grabeng pagbaha sa dakbayan sa Sugbu ug sa Mandaue.
Ang na-missing giilang si Vrille Dave Amay , tinun-an sa Grade 2 sa Camputhaw Elementary School kinsa giingong naligo diha sa sapa sa Lower Purok 3 sa Barangay Camputhaw.
Sumala pa sa desk clerk sa barangay Camputhaw nga si Virgie Quitoy nga alas-9 pasado sa buntag kagahapon giingong nagduwa-duwa ang bata sa sapa samtang dili pa kaayo kusog ang sulog apan wala kini makabantay sa kalit nga pagkusog sa bul-og sa tubig ug gianod. Aduna pay mga estambay nga misuway unta og luwas sa bata apan wala na kini maabti gumikan sa kakusog sa baha. Ang ginikanan sa maong bata nga sila si Valentino Amay namasahero og jeepney uban sa asawa niining si Maria Vanessa.
Samtang adunay gikatahong wala mailhing hamtong nga babaye ang giingong gianod usab sa sapa diha sa Banilad ug nasigpatan diha sa barangay Sapangdaku sa dakbayan sa Mandaue sa Mahiga Creek apan wala makakumpirmar niini ang mga opisyales sa barangay Banilad sa Mandaue ug barangay Banilad sa dakbayan sa Sugbu ug sa kapolisan.
Ang kalit nga pagbunok sa kusog nga uwan mimugna og grabeng pagbaha sa downtown ug uptown area sa dakbayan sa Sugbu.
Si Cebu City Mayor Michael Rama uban sa mga sakop sa Cebu City Coordinating Council misusi sa mga dapit nga naapektahan ilabi na ang barangay Mabolo hangtud sa North Reclamation Area nga ang baha miabot sa hawak sa tawo.
Ang mga dumptrucks sa Department of Engineering and Public Works gigamit na aron hakuton ang mga natanggong nga mga pasahero sanglit sagad sa mga sakyanan nga misuway og taak sa tubig ang mitiurok.
Gumikan sa baha wala madayon ang courtesy call ni British Ambassador Stephen Lillie sa buhatan ni Mayor Rama.
Sa dakbayan sa Mandaue
CEBU, Philippines - Gawas sa maong nangaanod aduna pay mga batang giluwas sa mga residente diha sa barangay Tipolo ug mga tinun-an sa Guizo Elementary School.
Sa sitio Gothong ug Malibu sa barangay Subangdaku usa ka bata nga nakalimtan sa inahan nga giduyan sa sulod sa ilang panimalay ang gikatahong nalumos ug dali kining naluwas ug gidala sa tambalanan.
Ang mga sakop sa Accident Control and Emergency Rescue Team (ACERT) mikutay og pisi aron makapyotan sa mga tawo.
Ang mga sakop sa Emergency Rescue Unit Foundation (ERUF), Bureau of Fire Protection rescue units mipakatap na sa ilang mga sakop aron pagtabang sa mga naapektahan.
Si Analisa Sareniana sa ACERT nga nahinabi sa Banat News miingon nga naglakip sa mga gilunopan nga lugar mao ang Guizo Elementary School.
Ang prinsipal nga si Lydia Tagalog giluwas sa rescue team sa ACERT ug gatusang mga tinun-an ug mga magtutudlo dihang miabot na ang tubig sa ilang hawak. Gihiklin usab sa mga sakop sa ACERT ang mga molupyo sa sitio Gothong sa barangay Subangdaku tungod kay gilunopan na sa tubig gikan sa miawas nga sapa.
Dugang nakasInati og grabe nga pagbaha mao ang dalan A.S, Fortuna sa barangay Banilad, barangay Tipolo ug ingon man usab ang eskina sa barangay Pagsabungan ug barangay Basak sa maong dakbayan.
Si Sareniana miingon nga usa sa nakaingon niini mao ang kabalayang gitukod diha sa daplin sa mga sapa ug gagmay nga mga kanal.
Ang day care center usab sa barangay Poblacion sa dakbayan sa Lapulapu ang lakip usab sa gilunopan.
Si Mayor Jonas Cortes kinsa personal nga mihimo og pakisusi sa maong hitabo miluwat og kamandoan sa City Social Welfare Office (CSWO) sa paghatag og pagkaon sa mga apektadong residente.
Usa ka tigom sa City Disaster and Coordinating Council (CDCC) ug ni Cortes ang gihimo alang sa pagdeklarar sa state of calamity sa upat ka barangay nga mao ang Subangdaku, Tipolo, Guizo ug Basak.
Gimando ni Cortes sa mga barangay kapitan sa maong mga lugar sa paghawan sa kabalayan daplin sa mga sapa. - Nila ni Rey Pasaporte ug report nila ni Romeo Limpangog ug Sanden Anadia (BANAT NEWS)