Curfew ipatuman na sab sa Talisay

CEBU, Philippines -  Ang kabarangayan sa dakbayan sa Talisay milugak na sa pagpatuman sa   curfew sa mga batan-on hinungdan nga daghan na usab ang nag-libudsuroy karon sa kadalanan sa dakbayan bisan lawom na ang kagabhion.

Gumikan niini mibahad si City Administrator Richel Bacaltos nga repasuhon niya ang maong ordinansa aron nga ikapadayon ang pagpatuman niini.

Kini tungod kay may mga batan-on nga nalambigit   sa krimen sama sa usa ka 17 anyos nga napusilan patay sa milabay’ng semana.

Matud ni Bacaltos nga ang kabarangayan kinahanglang maoy mo-implementar niini apan posibleng nakigsabot-sabot na ang mga konsehal sa mga opisyal sa kabarangayan ilabi na nga bag-o na ang mga opisyales karon human sa milabay’ng piniliay sa barangay ug Sangguniang Kabataan niadtong buwan sa Oktubre sa milabay’ng tuig.

Gitakda nga karong Pebrero 5, 2011 sa binuwang meeting sa Association of Barangay Captain (ABC) motambong ang grupo sa City Social Welfare and Development (CSWD) diin ilang ipadayag sa maong meeting ang kabahin sa hugtanong implementasyon sa curfew. (BANAT NEWS)