CEBU, Philippines - Pormal nang misang-at og reklamo si Medillen mayor Ricky Ramirez batok ni PO3 Arnold Bocayong ang imbestigador sa Criminal Investigation and Detection Group (CIDG)-7 diha sa buhatan sa Ombudsman for the Visayas kagahapong adlawa.
Si Ramirez nga gi-ubanan sa iyang abogado nga si Atty. Rolando Pedrosa mi-awhag sa Ombudsman nga ipa-subpoena ang usa ka freight company nga nagbase sa ilang lungsod.
Matud pang Ramirez nga ang maong kompanya maoy huloganan sa tag P20 mil ngadto sa P30 mil nga ‘protection money’ matag bulan nga dawaton ni Bocayong gikan sa mga illegal gambling ug illegal fishing operators sa ilang lungsod.
Si Bocayong daan nang mihimakak sa tanang mga alegasyon batok kaniya ug miklarong walay personalan ang ilang imbestigasyon sa CIDG sa kamatayon sa bodyguard ni Ramirez nga si Edelberto Abao.
Migawas sa ilang imbestigasyon nga napusilan ni Ramirez si Albao. Si Ramirez kusganon usab nga mihimakak niini. Samtang gihulagway ni Bocayong nga purely harassment ra ang gihimo kaniya ni Ramirez.
Gipasabot sa mayor nga napugos siya pagpasaka og kaso batok sa maong polis human usab siya makahipos og daghang mga ebidensiya batok sa mga illegal nga buhat niini diha sa ilang lungsod.
Apil na niini ang gitumbok sa mayor nga pagpangilad niini pinaagi sa pag-isyu og mga fake nga I.Ds. sa mga sakop sa Mayors Squad aron i-tap isip anticrime group unya pabayron og tag P100 ngadto sa P150 ang matag I.D.
Masaligon ang mayor nga mapamatud-an niya ang iyang pasangil batok sa maong polis nga gihulagway niyang corrupt ug nakigkunsabo karun kang Bimbim Abao anak sa namatay nga si Abao.
Daku ang pagtuo sa mayor nga pagpangwarta ang tuyo sa pagpasaka og kaso batok kaniya ug siya maoy giduot nga suspek sa krimen.
Si Ramirez mihangyo usab kang Gov. Gwendolyn Garcia nga pa-relibuhan ang hepe sa Cebu Police Provincial Office Sr. Supt. Erson Digal may labot gihapon sa maong kaso.
Kini human nasuko ang mayor nga gipublikar ni Digal diha sa mga report sa pamantalaan nga siya ang suspek sa kamatayun ni Abao. (BANAT NEWS)