Lokal nga karne luwas kan-on - DVMF

CEBU, Philippines - “Luwas ang karne sa siyudad.” Mao kini ang hugtanong mensahe sa hepe sa Department of Veterinary Medicine and Fisheries (DVMF) nga si Dr. Alice Utlang kalabot sa isyu nga miulbo kagahapon nga matud pa positibo sa bacteria ang lokal nga karne partikular na sa dakbayan sa Sugbo ug sa siyudad sa Mandaue.

Sumala pa ni Utlang nga dili makiangayon ang giingong pamahayag sa usa ka laboratory technologist gumikan kay dili patas ang giagian niini nga proseso.

Gidudahan usab niya nga nakuha sa aseras ang gikuha niini nga sample.

“Responsibilidad gyud na tali sa tindahan ug sa mamalitay og karne. Amo sila nga giawhag nga adto gyud mopalit og karne sa tindahan nga dunay meat inspection certificate,” sumala pa ni Utlang. 

Dugang pa niya nga tambag ngadto sa publiko nga modangop gyud sa ilang buhatan kung kini gibaligyaan og mga dautang karne.

“Ang mga tindahan nga dunay meat inspection certificate, segurado gyud nga luwas ilang baligya. Huna-hunaon lang nato, kung ikaw usa ka negosyante, mohatag gyud ka og dekalidad nga produkto ngadto sa mga customers aron mobalik kini sa imong tindahan,” saysay pa ni Utlang.

Kahinumduman nga dunay usa ka technologist ang mipatim-aw sa miaging adlaw ug mipadayag nga iyang gi-eksamin ang pinalit niya nga karne sa merkado sa dakbayan sa Sugbo ug Mandaue ug nadiskubrehan niya nga duna kini e.coli bacteria nga makahatag og peligro sa panglawas sa tawo.

Samtang si Cebu City Market Administrator Racquel Arce mipadayag nga ang usa ka “self serving” ug “bias” ang maong resulta ug tataw nga tua kini mopabor ngadto sa usa ka dealer og frozen meat.

Usa ka dealer og mga frozen meat ang mireklamo pipila ka semana ang nakalabay tungod sa kampanya batok sa pagsulod sa mga frozen meat sa nagkadaiyang merkado publiko.

“Huna-hunaon nila, sa 178 ka mga mamaligyaay og karne sa Carbon Market, nagkuha sila og sample sa usa lang ka tindahan,” nagkanayon si Arce.

Samtang si Edgar Amores, board member sa Cebu Market Vendors Development Cooperative (Cemvedco) nasagmuyo sa maong balita gumikan kay segurado gyud nga maapektohan ang mga negosyante og lokal nga karne.

Sumala pa niya nga posibleng mahadlok na mamalit ang mga tawo og karne sa merkado gumikan sa maong taho ug dako kaayo kini og kadaot nga mahatag sa ilang panginabuhian.

Dugang pa ni Amores nga luwas ang ilang mga baligya sanglit ila man kining responsibilidad sa mga konsumidor.

Hangyo niya sa publiko nga dili dayon magpadala sa isyu ug ipabilin ang pagpalit og karne sa tindahan nga dunay meat inspection certificate. (BANAT NEWS)