Batang gisabak gilabay sa libon

CEBU, Philippines - Gibana-banang pito ngadto sa siyam ka bulan nga batang gisabak gisalibay sa wala hiilhing inahan sa kasagbutang bahin sulod sa school campus sa Poog Elementary School sa barangay Poog siyudad sa Toledo niadtong Domingo sa alas 8:30 sa buntag.

Subay sa inisyal nga imbistigasyon ni PO3 Edmund Liston sa Toledo City Police usa ka manugwayay og kanding ang nakadiskobre sa maong bata nga gilabay sa maong dapit nga giputos pa og panapton.

Sa wala pa kini madiskobre, usa ka babaye nga wala hiilhi ang nakita sa mga molupyo sa maong lugar nga milabay og putos apan dali kaayong mipalayo sakay sa usa ka motorsiklo paingon sa barangay Cantabacco nga direksiyon.

Gituohan sa kapolisan nga usa ka babaye nga pinaangkan ang milabay sa iyang gisabak sa maong lugar.

Ang kapolisan sa dakbayan sa Toledo padayon pang naniid aron ilhon ang maong inahan.   (BANAT NEWS)