Lumba sa kabayo sa Enero 28

CEBU, Philippines - Mas gipalambo pa pag-ayo sa kagamhanan sa lalawigan sa Sugbo ang Governor’s Cup Horseshow and Competition (GCHC) tungod sa kalampusan niini sa nakalabay’ng tuig.

 Kini pinaagi sa pagtakda na usab sa buhatan ni Gobernador Gwendolyn Garcia sa maong kompetisyon karong Enero 28- hangtod Enero 30 sa North Reclamation Area sa siyudad sa Mandaue city.

 Sigun pa ni Norma Capitay,   ang event organizer nga anaa na karon sa ikaupat nga tuig ang pagpahigayon sa maong matang sa sports tungod sa walay puas nga pagsuporta ni Gobernador Garcia niini.

 Matud pa ni Catipay nga klaro kaayo ang kalampusan niining maong matang sa kompetisyon nga gipasiugdahan sa kagamhanan sa lalawigan sa Sugbo sa miaging tuig sanglit ubay-ubay sa mga langyaw nga mahiligon sa kabayo ang misalmot niini.

 Dugang pa ni Catipay nga tumong gayud sa nahisgutang kalingawan nga masayod ang mga Sugbuanon sa pagpasanay sa mga kabayo dinhi sa lalawigan sa Sugbo.

 Gani gipaabot sa nahisgutang event organizer nga human unya sa championship karong Enero 28, ipadayon sa kagamhanan ang pagpasanay sa mga kabayo    sa lalawigan.   (BANAT NEWS)