2 ka pusher og shabu nasikop

CEBU, Philippines - Duha ka suspetsadong pusher og shabu nagtingkagol sa Carcar City detention cell human masikop sa gipahigayong buy-bust operation sa kapolisan didto sa sitio Lumboy, barangay Liburon, dakbayan sa Carcar sa miaging gabii.

Ang mga nasikop mao sila si Saldito “Saldy” Saducas, 53, ug Julito “Digoy” Saducas, 34, pulos mga nagpuyo sa nahisgutang dapit.

Nasakmit sa mga polis gikan sa duha mao ang 12 ka paketeng shabu, upat ka tag P100 nga kwartang papel, ug P200 nga buy-bust money.

Si SPO1 Rolando Bastida kinsa maoy nangulo sa operasyon mibutyag nga ang mga suspetsado daan na nilang gipanid-an sukad pa niadtong milabay’ng tuig.

Matud ni Bastida nga si Digoy maoy mitunol og shabu ngadto sa poseur buyer ug si Saldy maoy midawat sa marked money nga kunohay gibayad sa poseur buyer.

Si Digoy giingong mitug-an sa mga polis nga ang ilang supplier sa ginadiling drugas naggikan sa dakbayan sa Sugbo apan nagdumili kini sa pagtug-an sa ngalan.

Si Bastida midugang nga ang ubang mga paryente sa mga suspetsado giingong nalambigit usab sa pagpamaligya og ginadiling drugas sa ilang barangay.  (BANAT NEWS)