Marijuana gilarot

CEBU, Philippines - Mikabat og 354 ka mga punoan sa tanom nga marijuana ang gilarot sa hiniusang team sa mga polis ug mga sundawo didto sa sitio Calungawan sa barangay Langusing sa dakbayan sa Danao sa miaging adlaw.

Sa nalarot, 206 niini ang mga hamtong nang punoan, samtang ang 148 bag-o pang tinanom.

Ang grupo sa kapolisan sa Danao gipangulohan ni SPO2 Joel Barriga samtang si 1LT Lorenzo Siobal Jr. sa 52nd Infantry Battalion sa Philippine Army nga nagbase sa Dungoan, dakbayan sa Danao maoy nanguna sa grupo sa mga sundawo nga mitungas ngadto sa Calungawan, may 25 kilometros gikan sa Poblacion, Danao.

Si PO2 Marlon Remullo sa kapolisan sa maong dakbayan nga nahinabi sa Banat News miingon nga   sayo niini nakadawat sila og taho kalabot sa maong plantasyon didto sa nahisgutang dapit.

Migikan ang grupo sa kapolisan ug mga sundawo sa alas 6:00 sa kabuntagon diha sa Poblacion ug naabot sila ngadto sa Calungawan nianang pagka-alas 11:00 sa kaudtohon.

Dugang pa ni PO2 Remullo nga atol sa maong pagpanglarot wala hidakpi sa kapolisan ang mag-uuma nga nananom niini ug wala usay mga silingan nga nakatug-an sa nananom sa maong ginadiling matang sa tanom.

Ang inibot nga mga tanom anaa karon sa buhatan sa kapolisan sa dakbayan sa Danao.   (BANAT NEWS)