CEBU, Philippines - Misuporta ang Cebu Chamber of Commerce and Industry (CCCI) sa giduso nga amendamento sa City Ordinance 1408 bahin sa hingpit nga pagdili o pag-ban sa lingam ug yoni massage sa mga massage parlor ug spa sa siyudad sa Sugbo.
Ang maong amendment naghatag usab og gahom sa Cebu City Anti-Indecency Board (CAIB) nga makahimo sa pag-inspeksyon sa mga massage parlor ug mga spa nga gidudahang nagtanyag og lingam ug yoni.
Si Consul Samuel Chioson, pangulo sa CCCI, mipadala og sulat sa konseho ug mipadayag sa hugot nila nga suporta aron mahimo ang Sugbo isip “Capital of Beauty”.
“To allow visitatorial power of the CAIB is an open admission on the legitimacy of their operations”, nagkanayon si Chioson.
Ang maong grupo nalipay sa operasyon nga gihimo sa CAIB aron magpabilin kini sa paghatag og importansya sa moralidad sa tawo.
Sayo niini gipadayag sa tsirman sa CAIB nga si Dr. Lucille Mercado, nga ang kalihokan sa lingam massage nakalapas sa Section 6 (F) sa maong ordinansa kalabot sa pagbuhat og law-ay nga mga butang.
Dugang pa ni Mercado nga ang lingam massage, maoy matang sa masahe nga law-ay diin mobayad lang gyud ang kliyente aron makaangkon sa maong serbisyo sa mga babaye nga mo-lingam kanila ug tataw nga makapadasig kini sa prostitusyon. (BANAT NEWS)