CEBU, Philippines - Namatay ang usa ka lalaki nga wala mag-helmet human madasmag sa railing sa karsada ang motorsiklong gisakyan niini didto sa barangay Legaspi, lungsod sa Alegria niadtong Sabado sa hapon.
Ang biktima mao si Dione Apares, 27, taga barangay Mambaling, dakbayan sa Sugbo.
Si SPO1 Renato Ablellar sa Alegria Police Station nagkanayon nga si Apares nagmanehong walay helmet sa iyang XRM Honda nga motorsiklo nga nagtangag sa plakang GO-3088 nga nagbiyahe gikan sa barangay Poblacion sa nahisgutang lungsod paingon sa habagatang bahin. Matud ni Abellar nga kusog ang padagan ni Apares sa iyang motor ug pag-abot sa kurbadahon nga bahin sa national highway sa Legaspi nadakin-as ang mga ligid niini tungod sa kadangog sa karsada hinungdan nga mibaliwliaw ang sakyanan ug didto mapunta sa railing daplin sa karsada diin didto usab mapantok ang ulo sa biktima nga maoy hinungdan sa hinanali niyang kamatayon.
Ang mga estambay sa maong lugar maoy mihatod sa biktima ngadto sa tambalanan apan wala na kini makaabot nga buhi gumikan sa pagliki sa bagolbagol niini kay wala man magsul-ob og helmet. - BANAT NEWS