CEBU, Philippines - Napalgan na kagahapon sa Philippine Coast Guard sa kadagatan sa Leyte ang usa ka Amerikanhong yati nga gitahong nawagtang samtang naglawig gikan sa Guam paingon nganhi sa Sugbo.
Si Deputy Commander Anelito Gabisan, ug tigpamaba sa Central Eastern Visayas Coast Guard nagkanayon nga ang Pineapple Yacht nasigpatan sa PCGI Islander rescue aircraft sa mga alas 10:00 sa buntag didto sa Leyte Gulf.
Mipahibawo dayon kini sa ilang rescue vessel nga mao ang BRP San Juan aron sa pagsalbar maong yati.
Didto nasayran nga may pasahero kining naangol kay naguba ang maong sakyanan gumikan sa linamba sa mga dagkong bawod sa kadagatan nga ilang gilabang.
Kagahapon na sa ala-1:00 sa hapon mapalgi sa BRP San Juan ang nahimutangan sa Pineapple.
Si Gabisan nagkanayon nga ang Pineapple ilang guroyon ngadto sa ilang estasyon sa Maasin City sa habagatang bahin sa Leyte aron makapatubil kini og gasoline ug makapadayon sa ilang biyahe paingon sa Cebu.
Si Eduardo Bulalaque sa Maasin City Coast Guard Operations Officer nagkanayon nga ang Pineapple gikatakdang moabot karong adlawa didto sa ilang estasyon ug ila pang susihon ang panglawas sa mga sakay niini.
Ang Pineapple mibiya gikan sa pwerto sa Guam niadtong Enero 6, 2011 sakay ang lima ka mga lalaki ug babaye ug gilauman unta sa ilang mga paryente sa Cebu nga maabot niadtong Enero 16, 2011 atol sa Sinulog apan gumikan sa pagka-aberiya niini wala makaabot sa maong adlaw. - BANAT NEWS