CEBU, Philippines - Naghangos ug nagtibi nga nahidangat sa buhatan sa kapolisan sa lungsod sa Liloan ang usa ka tawo nga gigukod og kutsilyo sa nag-wild niyang silingan didto sa sitio Pag-utlan sa barangay Yati, lungsod sa Liloan sa miaging hapon.
Ang biktima mao si Joel Sanchez Hopia, 36, samtang ang migukod kaniya mao si Roy Quintom, hingkod, nga silingan ra usab ni Hopia sa Pag-utlan.
Si SPO4 Remegio Ilacion sa kapolisan sa maong lungsod nga nahinabi sa Banat News miingon nga ang suspetsado nga gituohang nagmaoy sa kahubog mibunal og sista sa ulo sa biktima ug napusgay ang maong sista.
Dugang pa ni Ilacion nga human pusposi og sista, gikulata pa gyud sa suspek ang biktima busa nahagba kini sa yuta.
Unya dihadiha milanit ang suspek sa iyang kutsilyo kay lubaon na unta niini ang biktima aron tiwasan apan nakabangon ang biktima ug mikabad og dagan paingon sa buhatan sa kapolisan.
Nasalbar sa tinong kamatayon ang biktima kay wala na mogukod kaniya ang suspetsado sa kabalaka nga adto siya moderetso sa prisohan.
Nagkamamad ang tingog sa biktima nga nangayo og panabang sa kapolisan sa lungsod.
Dihadiha milihok dayon ang kapolisan sa pagpangita sa suspetsado apan wala na kini igkita. - BANAT NEWS