Quisumbing mitabang sa 500 ka scholar

CEBU, Philippines - Giniyahan sa pagtoo nga nag-unang prayoridad ang edukasyon sa kabataan alang sa pagseguro sa ilang maayong kaugmaon, si 6th District Congressman Gabriel Luis Luigi Quisumbing mihimo sa iyang pasiunang pagtabang sa 500 ka mga estudyante sa distrito nga gilangkuban sa dakbayan sa Mandaue ug sa mga lungsod sa Consolacion ug Cordova.

Iyang gipasabot sa mga iskolar nga kining maong programa dili lamang makahatag og benepisyo sa mga hingtungdan kun dili, mag-umol usab kini kanila nga mahimong responsableng mga konstituwente sa distrito.

Mao nga aduna unya’y mga seminar ug training nga ihatag usab unya ngadto kanila aron sa pagseguro nga mahimo silang competitive o takos sa bisan unsang aspeto sa pagpanarbaho ug panerbisyo.

Ang Department of Social Welfare and Development (DSWD) gihimong partner sa iyang opisina aron sa pag -screen ug sa paghatag sa pundo ngadto sa mga iskolar unya dungan sa pagpirma sa Memorandum of Agreement, (MOA) si Kongresista Quisumbing mipasalig nga iyang doblehon ang gidaghanon sa iyang mga iskolar sa mosunod nga school year 2011-2012.

Mao nga gikan sa 500 nga gidaghanon, mamahimo na unyang 1000 ka mga estudyante ang ilang katabangan.

Iya usab nga gihangyo ang mga iskolar nga nakadawat og hinabang sa iyang opisina nga magtinarong sa ilang pagtungha ug dili usikan kining maong kahigayonan nga ilang nahuptan.

Apil na usab ang iyang panawagan sa matag usa nga aktibong magpakabana sa kahimtang ug panginahanglan usab sa ilang komunidad base sa ilang kursong gi-eskwelahan.

 Aron pinaagi niini, makabawos sila sa mga magbubuhis sa distrito nga maoy tinubdan usab sa ilang napahimuslang scholarship program. (BANAT NEWS)