Giluba sa bayong-bayong nga iyang gikulata

CEBU, Philippines - Nabulit sa mga samad dinunggaban ang lawas sa usa ka lalaki human kini lubaa sa usa ka 15 anyos nga bayong-bayong didto sa Barangay Poblacion, Lungsod sa Borbon, sa miaging kaadlawon. Ang biktima mao si Jessie Elaida, 19, lumad nga taga Camotes Island apan kasamtangang nagpuyo sa Sitio Intermedia, Lungsod sa Borbon.

Sumala sa kapolisan sa Borbon nga didto sa sulod sa imnanan ang biktima ug dihang nalasbag na giingong gikulata niini ang bayong-bayong nga silingan ra usab sa biktima.

Human kulataha, miuli ang batan-on sa ilang balay ug sa pagbalik niini nagtangkil na og kutsilyo ug sa walay kukahadlok giligid og luba ang biktima busa nabulit sa mga samad sa kutsilyo ang kalawasan niini. 

Si SPO2 Morie P. Magdadaro ug PO2 Roy M. Hortelano sa Borbon Police Station kinsa maoy miresponde sa maong hitabo maoy misikop sa suspetsado ug gisakmit usab ang kutsilyo niini dayon ilang gitunol ang maong suspetsado ngadto sa mga tinugyanan sa social welfare sa lungsod.

Samtang ang biktima didto usab ihatod sa Juan Dosado Hospital sa lungsod sa Sogod. (BANAT NEWS)