'Spiderman' mikanaog

CEBU, Philippines - Kagutom ang hinungdan maong mikanaog kagahapon sa udto ang tawong gibansagan sa mga tawo nga si Spiderman human sa 44-oras (duha ka gabii ug dul-an duha ka tibuok adlaw) nga nagtungtong ibabaw sa usa sa mga dagkong poste sa Marcelo Fernan Bridge.

Ang nauwanan ug nainitan ibabaw sa taytayan nagpailang si Jecy Mollena, 20, lumad nga taga Don Carlos sa Bukidnon ug kasamtangang nagpuyo sa barangay Basak sa lungsod sa Carmen, Cebu.

Kagahapon sa mga alas 11:45 sa udto nakahukom si Mollena nga mokanaug human mabatyagi ang grabeng kakutoy sa iyang tiyan tungod kay duha ka adlaw na kini napasaran sa pagkaon.

Si Mollena sumala pa, diha miagi sa kable padulong sa ubos sa pagtuong walay mga polis sa palibot hinungdan sa naangkon niining mga paslot ug garas sa iyang paa ug lapalapa ug pag-abot sa ubos kalit kining gisignit sa mga nagsibilyang mga polis.

Si Mollena gidudahang kawatan ug nanguha og mga kable og wires diha sa maong taytayan tungod sa gidala niining sako ug sundang apan kini kusganon niyang gihimakak atol sa pagsukit-sukit kaniya kagahapon. Matud pa niya nga wala usab siya’y planong magpakamatay pinaagi sa pag-ambak sa maong taytayan ug maong misaka siya sa taytayan aron magpaabot og barkong padulong sa Mindanao.

Plano niyang moambak sa maong barko aron libre siyang makauli sa Bukidnon butang nga wala tuohi sa kapolisan gawas lang sa pagdudang posibleng aduna kini deperensya sa pangisip.

Sa pakighinabi sa Banat News kang Mollena kini mitug-an nga gikan pa siya sa lungsod sa Carmen ug dunay buot mopatay kaniya maong niadtong adlaw’ng Martes nagbaklay siya padung sa maong taytayan.

Nasuta sa Banat News nga walay barangay Basak sa Carmen apan ang mas layo nga silingan niining lungsod nga Catmon adunay barangay Basak.

Matud pa niya nga misaka siya sa ibabaw ug wala mokanaog tungod sa kahadlok nga patyon sa tawong buot mopatay kaniya apan kagahapon sa udto gumikan sa dili na maantos nga kagutom kini mikanaog.

Si Lapulapu City Police Office director Sr. Supt. Anthony Obenza miingon nga husto ang ilang gihimong pamaagi nga wala nila kini pugsa sa pagpakanaug kay nakita niyang wala kini planong maghikog.

Pag-abot ni Mollena sa LCPO miinsister sa mga polis nga pakitaan siya sa warrant of arrest nganong gidakop siya.

“Kun maminaw ka sa iyang pamahayag daw makatuo ka nga adunay kakulian sa iyang pangisip. Pero kini masuta gyud sa pakisusi sa mga batid nga psychologist,” matud pang Obenza.

Kasong theft ug alarm and scandal ang ipasakang kaso batok ni Mollena gumikan sa iyang nahimong estorbo sud sa maong taytayan sa milabay’ng duha ka adlaw ug ang pagkawat sa mga linya sa kable sa CCTV, si Mollena ipaubos usab sa mental examination.

Nakuha gikan kaniya ang mga pinutol nga kable, bolo, navigational lights ug uban pa.

Human niini gipakaon usab siya sa kapolisan una pa gisulod sa bilanggoan. (BANAT NEWS)