Radaza nakigkontra sa PhilSCA

CEBU, Philippines - Giaprobahan sa konseho sa dakbayan sa Lapulapu ang paghatag og katungod kang Lapulapu City Mayor Paz Radaza sa pagsulod og kontrata tali sa Philippine State College of Aeronautics (PhilSCA) alang sa ilang “Community Extention Service Program”.

Base sa Memorandum of Agreement (MOA) nga gipirmahan sa mayor ug sa PhilSCA nga giduso ngadto sa konseho niadtong Enero 13, 2011 ilang gilig-on nga magtambayayong sa ilang programa sa matag barangay sa pag-edukar sa mga walay trabahong ginikanan, tinun-an ug ang mga wala na magtungha alang sa sayon nga panginabuhi.

Matud pa ni Dr. Nonadel Alvarado Soriano ang Campus Director sa PhilSCA Mactan Benito Ebuen Air Base Campus nga ang maong programa dugay nang nahunahunaan sa bag-ong natudlong Presidente sa PhilSCA nga si Dr. Bernard R. Ramirez diin gawas sa ilang mga kurso nga gitanyag sa maong tunghaan, kahatagan usab og kahigayonan ang mga walay trabaho og laing paagi nga ilang irekomendar ngadto sa Technical Educations Skills and Development Authority o TESDA.

Atol sa regular nga sesyon sa konseho sa dakbayan sa Lapulapu sa milabay’ng hapon, si Konsehal Eduardo Cuizon nga maoy Chairman sa komitiba sa edukasyon sa konseho wala maglisod sa pagkombinser sa iyang mga kaubanan sa maong programa sa PhilSCA .

Gani si Konsehal Antonio “Titing” Senerpida usa sa mipadayag sa iyang suporta sa maong MOA ilabi na nga ang edukasyon maoy usa sa nag-unang programa sa pamunoan ni Mayor Radaza .

Maoy hinungdan nga gitugotan nila si Mayor Radaza sa pagpirma sa maong MOA aron kasugdan dayon ang maong programa sa labing dali nga panahon.

Sa maong MOA gilig-on nga sugod karong bulana hangtod sa bulan sa Mayo 2011 ang PhilSCA magsugod na sa pagtudlo og mga technical skill sa kabarangayan nga maglakip sa basic electronics, practical electricity, sheet metal ug computer literacy ug uban pa. Sumala ni Dr. Ramirez   nga kini maoy una palang bahin sa ilang programa ngadto sa mga molupyo sa dakbayan sa Lapulapu ug sunod niini mao ang pagpahiluna sa mga tinun-an sa kasudlan nilang trabaho base sa ilang nakat-onan sa maong programa.

Mapasalamaton usab si Dr. Soriano sa mga sakop sa konseho sa dakbayan sa Lapulapu sa paghatag kanila og kahigayonan nga makaserbisyo gawas sa ilang tunghaan ngadto sa mga residente nga walay mga trabaho kay usa kini sa mandato sa PhilSCA ang pagpalapad sa ilang serbisyo ngadto sa publiko. (BANAT NEWS)