Laing drug pusher sa Danao tiklo

CEBU, Philippines - Laing tigpayuhot og ginadiling drugas nadakpan sa kapolisan didto sa barangay Tabok- Kamaligbato, sa dakbayan sa Danao kagahapon sa buntag.

Si Roso Almacin, 33, maoy nadakpan pinasikad sa Search Warrant nga dala sa kapolisan nga mironda sa ilang balay.

Ang maong   orden de aresto giluwatan ni Judge Marilyn Yap sa Regional Trial Court Branch 28 sa dakbayan sa Mandaue.

Nakuhaan si Almacin og napulo ka paketeng shabu, duha ka magazine sa .45 nga kalibre sa armas, duha ka buhing bala ug mga kahimanan sa paghingos og shabu.

Ang ronda gipangulohan ni Police Chief Inspector Eddie Recamara sa Danao Police Station inabagan sa mga sakop sa Philippine Drug Enforcement Agency (PDEA) 7.

Si SPO1 Allan Muñoz mitug-an nga si Almacin ilang gipanid-an sukad pa sa miaging tuig human sila makadawat og report kabahin sa pagpamaligya niini og ginadiling drugas sa ilang lugar.

“Wala na siya mosuway sa Sukol kay na-corner naman namo ang iyang balay,” matud pang Muñoz kinsa midugang nga anaa sa ilang listahan si Almacin.

Si Almacin nagdumili pagtug-an si kinsa iyang supplier og drugas sa dakbayan sa Sugbo.

Kasong kalapasan sa section 11 of RA 9165 ang giandam na sa kapolisan nga kaso batok kang Almacin.

Kini maoy ikatulong higayon nga mipahigayon og ronda ang kapolisan batok sa mga negosyante og ginadiling drugas sa dakbayan sa Danao.

Sa miaging semana si Alvin Labador nakuhaan og 89 ka pakete nga shabu nga nagkantidad og P30 mil, kini human hidakpi si Florita Batucan sa barangay Sabang. - BANAT NEWS