Mga magpapatigayon gipahinumduman sa pag-renew sa ilang business permit

CEBU, Philippines - Gipahibaw ni Cebu City Treasurer Ofelia Oliva nga karon na ang katapusang adlaw sa renewal sa business permit sa tanang mga magpapatigayon nga adunay mga negosyo.

“They must try to catch up for their renewal,” matud pa ni Oliva nga nag-awhag sa mga magpapatigayon tungod kay dili na sila mo-extend sa katapusang adlaw sa pag-renew ug dili sila mohunong og gukod niini sa ilahang tagsa-tagsa ka mga business permits ug mamahimo pa silang makamulta og dako.

Dugang pa niya nga adunay mga sekretong namaligya sa ilahang mga panimalay nga wala mangayo og business permit sa siyudad. Gibutyag usab niya nga ang total assessment tax due sa siyudad karong tuiga moabot og P1.1 bilyones sa tanang mga balay patigayon sulod sa buwan sa Enero 2 hangtud 18 diin ang namayad na niini miabot og P125.7 milyones.

Ang mga nakolekta nagagikan sa mga magpapatigayon nga nag-renew sa ilahang mga business permits alang karong tuiga sa padayon nga pagpadagan sa ilahang negosyo. 

Mapasigarbuhon usab si Oliva nga mas daghan ang nakolekta karon sulod lang sa tunga sa bulan kompara sa miaging tuig nga P1.2 bilyones ang assessment sulod sa buwan sa Enero 2 hangtud 31.

Siya mipasalig nga sa dili pa mahuman ang buwan sa Enero mas modaghan pa ang makolekta nga kwarta sa iyahang buhatan. Samtang sa laing bahin si Oliva midugang nga aduna na silay siyam ka mga hired Certified Public Accountants (CPAs) nga nagsugod na og audit sa kwarta diin maggikan dinhi kung pila ang ilahang i-declare nga tax deficiency.

Sumala pa ni Oliva nga sa 40 ka buok CPA nga iyahang gipangayo, siyam pa ang anaa karon sa City Hall. - BANAT NEWS