Ginang sikop sa ronda

CEBU, Philippines - Nagtingkagol sa Talisay City detention cell ang usa ka babaye kinsa giingong pusher og shabu human sa gipahigayong pagpangronda sa mga polis kagahapon sa buntag diha sa sitio Galaxy, barangay Tanke, dakbayan sa Talisay.

Ang suspetsado mao si Janet Cemine alyas “Nanay”, 37-anyos residente sa maong dapit.

Sila si Inspector Hugo Rio Ipong, PO3 Rey Bucao, PO3 Benedicto Lasque, PO2 Roy Lofranco, PO1 Euwen Pitogo ug PO1 Jubilee Catan dunay dalang search warrant nga giluwatan ni Regional Trial Court (RTC) Judge Soliver Peras sa Branch 10 sa ilang pagpangronda ngadto sa balay sa suspetsado.

Na-recover sa nahisgutang mga polis gikan sa balay ni Cemine ang duha ka medium nga paketeng shabu.

Si Cemine nga nahinabi sa Banat News kagahapon mihimakak sa pasangil batok kaniya.

Si Supt. Henry Biñas, hepe sa Talisay City Police Station nga nahinabi sa Banat News nagkanayon nga kaniadto ang kapuyo ni Cemine nadakpan gihapon sa grupo sa Philippine Drug Enforcement Agency (PDEA).

Niining bag-o lang duna silay nadawat nga report nga si Cemine na maoy giingong namaligya og shabu hinungdan sa maong operasyon. - BANAT NEWS