CEBU, Philippines - Giklaro ni Gobernador Gwendolyn Garcia nga siya maoy gihangyo sa mga opisyales sa City Traffic Operation and Management (CITOM) nga ablihan ang Larsian Access Road sa may Fuente Osmeña ning siyudad sa Sugbo atol sa Sinulog 2011 aron malugakan ang trapiko sa maong lugar.
Kini tungod ug alang sa kalampusan sa Sinulog Grand Parade niadtong Domingo.
Matud pa sa gobernador nga ang CITOM board mipasar og usa ka resulosyon nga naghangyo sa iyang buhatan nga tugotan sila nga kaablihan ang maong agianan nga gitawag nga Larsian Access Road .
Ang maong lugar gipanag-iya sa kagamhanan sa lalawigan ug gipasirad-an sa Kapitolyo tungod sa mga kaugmarang gipahigayon sa maong lugar.
Apan gitataw sa gobernador nga ang kagamhanan sa lalawigan dili na unta basolon sa nanggawas nga balita nga wala mapusli ang pagbukas sa Larsian Road niadtong Sinulog Grand Parade gumikan sa barado gihapon ang trapiko sa Fuente Osmeña tungod sa kadaghan na sa mga tawo.
Dugang pa sa gobernador nga wala na siya’y labot kung aduna gihapoy kahuot sa trapiko sa nahisgutang lugar bisan og gibuksan ang Larsian road.
Subli nga gipaklaro sa gobernador nga iyang giuyonan ang hangyo sa CITOM ug dili siya ang nanghagad niini nga buksan.
Gani gipahibawo sa gobernador nga lakip sa ilang gibuksan mao ang dalan luyo sa Palace of Justice niadtong gipahigayon nga procession bisan kun nahukman na kaniadto nga dili gyud buksan ang maong dalan gumikan sa nahitabong pagpusil patay ni anhing Rogelio Illustrisimo Sr. ang kanhi mayor sa lungsod sa Santa Fe atubangan nga bahin sa Provincial Comelec office sa sulod sa Capitol compound.
Dugang pa sa gobernador nga iya pa hinoong gitun-an ang laing gihangyo sa CITOM nga hingpit nang buksan sa publiko ang nahisgutang dalan. - BANAT NEWS