CEBU, Philippines - Mikunhod ang crime volume nga natala sa dakbayan sa Mandaue sa tuig 2010 itandi sa tuig 2009.
Si Senior Superintendent Noel Gillamac, director sa Mandaue City Police Office (MCPO) miingon nga ang 3,019 ka krimen nga natala sa ilang buhatan naglakip na kini sa pagpangawat, panulis, pagpamatay ug uban pa.
Matud pa ni Gillamac nga ang pagkunhod sa krimen sa dakbayan maoy resulta sa ilang gihingusgang kampanya batok sa mga kriminal ug sa pagpatuman sa police visibility.
Dugang pa niya nga sa pagpatunhay sa kahapsay ug kalinaw sa dakbayan nakatabang kaayo ang Barangay Intelligence Network (BIN) Barangay Safety officer kon barangay tanod .
Si Gillamac miingon nga dako kaayo og natampo sa ilang kalamposan ang suporta sa kagamhanan sa siyudad pinaagi ni Mayor Jonas Cortes kinsa mihatag og dugang sakyanan , handheld radio nga nakatabang kaayo sa ilang pagpatrolya sa kahilitang mga dapit panahon sa kagabhion aron pagsanta sa mga kriminal. - BANAT NEWS