CEBU, Philippines - Armas sa polis nga giingong nawala narekober sa usa sa mga gisuspetsahang mipusil patay sa chief security sa Alpha Executive Homes sa milabay’ng buwan diha sa eskina SRP sa barangay Lawaan Uno gipanag-iya diay sa usa ka pulis sumala pa ni Sr. Supt. Erson Digal.
Tungod niini nag-atubang karun og kasong administratiba si PO3 Louie Mancio Alalim kanhi nadestino sa Talisay City Police Station kinsa nadestino na sa Isla sa Camotes. Si Rolando Rodrigo gipusil patay sa usa sa duha ka mamumuno niadtong milabay’ng bulan diha sa nahisgutang lugar.
Sa imbestigasyon nga gihimo sa Investigation and Detective Management Branch (IDMB), niadtong Disyembre 19 sa alas-9 sa gabii usa ka Ruben Delima nga taga barangay Lagtang ug sakop sa Talisay City Intelligence Bureau (TCIB) gialarma human giingong nanghagis ug dihang girekisa sa barangay hall nakuhaan og .9mm Norinco nga dunay usa ka magazine ug unom ka buhing bala.
Human madakpi si Delima nagpa-blotter dayon si Alalim nga nawala ang iyang service firearm sumala pang Digal.
Apan si Sr. Insp. Ruben Cuizon, hepe sa IDMB nagkanayon nga adunay probable cause nga pasakaan og kaso si Alalim tungod kay iya ang armas nga nakuha kang Delima.
Si Delima natanggong pa karun sa karsel sa kasong illegal possession of firearms ug gisusi usab kung ang maong armas gigamit pagpatay kang Rodrigo, matud pang Digal.
Si Alalim patubagon unya sa hearing sa Regional Internal Affairs Service (RIAS) diha sa rehiyonal nilang buhatan. - BANAT NEWS