151 naluwas gikan sa naaberyang ferry

CEBU, Philippines - Luwas nga nakadunggo og balik ang 130 ka mga pasahero ug 21 ka mga tripulante sa M/V Super Shuttle Ferry-17 nga napagngan og makina ug na aberiya taliwala sa kadagatan sa siyudad sa Danao ug isla sa Camotes kagahapon sa buntag taliwala sa kusog nga hangin ug bawod.

Matud ni Anelito Gabisan ang deputy commander sa Coast Guard District Central and Eastern Visayas atol sa interbyu sa DyDD alas 6:30 sa buntag migikan sa pantalan sa Danao ang maong barko paingon sa isla sa Camotes ug gikatakda untang moabot alas 8:30 sa buntag.

Apan samtang nagdagan ang maong barko gikasugat niini ang mga dagkung bawod nga dinala sa kusog nga hangin hinungdan nga napagngan kini sa makina ug wala gyud makalahutay hangtud nga nagpautaw-utaw nalang kini.

Ang kapitan sa maong ferry boat nga si Dante Maglangit nangayo nalang og tabang gikan sa awtoridad nga magpaguyod nalang tungod kay dili na makasugakod sa dagkung bawod ug kusog nga hangin ang iyang barko.

Dali dayung nagpadala og rescue vessel ang PCG apil na ang Delta ug Safari Rescue nga nagbase sa siyudad sa Danao human usab makadawat og tawag ang kapulisan sa Danao sa maong alarma.

Matud pa ni Ronnie Candolly, operations in-charge sa Super Shuttle Ferry nga gipanag-iya sa Asian Marine Company nga nahinabi sa usa ka sibyaanan nga naluwas ang 130 ka mga pasahero ug 21 ka tripulante.

Si Candolly nagkanayon nga ilang gihatagan sa tanang serbisyo ang mga pasahero sama sa pagkaon ingon man pag-refund sa ilang mga tickets ug ang pagtabang kanila nga makabalhin og sakay sa laing barko aron makapadayon sa ilang biyahe sa Camotes. - BANAT NEWS