Mga opisyal sa Custom luwas sa attrition law
CEBU, Philippines - Gikalipay sa mga kadagkoan sa buhatan sa Customs Port of Cebu (CPOC) nga luwas na sila sa “Attrition Law” bisan napakyas sila pagkab-ot sa ilang target collection sa milabay’ng tuig 2010.
Base sa talaan sa ilang Cash Division office nasayran nga nakahipos lamang kini og P6.88 bilyones diin ubos kun itandi sa ilang takdang kolektahunon nga P7.1 bilyones.
Sa maong gidak-on kuwang ang ilang koleksyon og P314.5 milyones, matud pa ni Cebu Customs District Collector Ronnie Silvestre.
Si Silvestre mibutyag sa mga tigbalita nga mas taas sila og koleksiyon sa tuig 2010 kay nakaabot man og P6.88 bilyones kun itandi sa tuig 2009 nga mikita lang sila og P6.46 bilyones.
Hinuon bisan pa kun alakanse sila sa ilang koleksyon sa miaging tuig, apan matud pa dili na sila apektado sa attrition law.
Ang apiktahan sa maong balaod mao kadtong maalakanse og katunga sa ilang target collection busa paphaon sila sa katungdanan kaha ibalhin sila og laing puwesto gumikan sa kaluya nila mangolekta og buhis sa mga kargamento sa kadagatan.
Karong tuiga 2011 ang kolektahunon sa CPOC base sa mando ni Finance Secretary Ceasar Purisima ug BOC Commissioner Angelito Alvarez mao ang P9.3 bilyones nga nagkahulogan nga kinahanglang makakolekta sila og P28 milyones matag adlaw. (BANAT NEWS)
- Latest
- Trending
