Poster nga law-ay gidili na sa tindahan

CEBU, Philippines - Gihangop sa Lihok Filipina Foundation Inc.(LFFI) ang awhag karon sa konseho sa dakbayan sa Sugbo sa mga establisamento nga dili magpatuyang og butang og mga law-ay nga hulagway sa kababayen-an sa   poster ug billboard.

Matud pa ni Executive Director Tessie Fernandez sa LFFI nga dako silang uyon sa lakang sa konseho kay dili man ang mga sexy nga mga hulagway maoy makapadani sa katawhan sa pagpalit sa mga baligya sa usa ka tindahan kundili ang matang ug kalidad sa tinda ug ang presyo usab niini.

“Uyon kaayo mi sa gibuhat sa City Council, kay dili man gyud kinahanglan ang sexy photo aron lang gyud mahalin ang ilang product. Daghan man og maayo nga pamaagi aron ma-promote ang ilang products , ug dili na kinahanglan nga ang lawas maoy ibaligya,” suma pa ni Fernandez.

Sayo niini mipasaka og resolusyon si konsehal Edgardo Labella sa konseho aron pahugtan ang “public morals” ug ang pagkontrolar sa tanang aspeto sa operasyon ug kalihukan sa matag establisemento ilabi na ang mga bikini bar, resto-bar, massage parlor ug uban pa nga mga amusement center.

Si Labella mibutyag nga gikinahanglan ang pagmonitor ning maong mga balay kahilayan pinaagi sa Cebu City Anti-Indecency Board (CCAIB).

Ang mga lugar nga nahimutangan niini sama sa Morelos corner Escario Street plastada kaayo diha ang dakong poster sa usa ka babaye nga nagsul-ob og bikini ug law-ay kaayong tan-awon sa publiko.

Dugang pa sa konsehal nga dako kaayo kini og epekto kay dili lang mga hingkod ang makakita niini, kun dili lakip ang mga menor de edad nga sama ra nga gihungitan sila og law-ay ug hilas nga talan-awon sa palibot               

Miingon si Labella  nga dili maayong tan-awon sa mga bata ang mga law-ay nga larawan busa angayan lang nga mohimo og maayong pamaagi ang mga tag-iya sa nahisgutan nga mga establisamento sa pag-promote sa ilang negosyo nga dili mogamit og mga maot nga talan-awon. (BANAT NEWS)