Sikyu giiloga'g shotgun sa tulisan

CEBU, Philippines - Usa ka security guard nawad-an sa kargada niyang shotgun human kini iloga sa duha ka wala hiilhing mga lalaki nga pulos nagmaskara sa sulod sa compound nga iyang gibantayan didto sa barangay Paknaan, dakbayan sa Mandaue sa miaging kaadlawon.

Ang biktima mao si Estelito Maglasang, 27, ulitawo, nga taga barangay Panas, sa lungsod sa Consolacion nga guwardiya sa New Builder’s Development Corporation nga nahimutang sa Paknaan.

Si SPO3 Edgar Pasaylo sa kapolisan sa Presinto 3 sa Basak Police Station nga nahinabi sa Banat News miingon nga gikan pang nagtuman sa sugo sa lawas ang biktima ug sa pagbalik niini sa iyang puwesto kalit lang kining gisugat sa duha ka armadong lalaki ug gitionan sa armas nga wala matino ang kalibre, uban sa pahibawo nga tulis

Apan matud pa ni SPO3 Pasaylo nga imbis kuwarta ang pangayuon, shotgun sa guwardiya maoy gipangayo niini .

Ang biktima nga nakalitan mikurog sa kahadlok ug wala na moreklamo nga mitunol sa iyang armas ngadto sa mga tulisan.

Matud pa ni Pasaylo nga dali kaayong nakapahilayo ang maong mga tulisan dala ang shotgun sa biktima.

Sa pagkakaron padayon pang gipanid-an sa kapolisan ang maong mga tulisan. (BANAT NEWS)