Talisay gilunopan sa baha

CEBU, Philippines - Ang nagkalain-laing barangay sa dakbayan sa Talisay nasugamak na usab sa lunop tungod sa walay undang nga pagbunok sa uwan.

Ang mga residente sa barangay Lagtang ug Poblacion ug uban pang mga barangay sa maong dakbayan maoy nakasinati pag-ayo niini ug gani gumikan kay wala sila’y laing kaagian, mapugos lang gyud sila sa pag-ubog sa tubig nga taga tuhod ang giladmon ilabi na kun paingon sila sa trabaho, sumala pa ni Konsehal Celiapo Cabuenas.

Si Cabuenas kinsa maoy kanhi kapitan sa Lagtang nagkanayon nga ang sitio Hollowblock sa maong barangay maoy labing apektado sa baha diin may mokabat sa 30 ka balay ang naglubog sa tubig.

Miingon si Cabuenas nga matag bundak sa uwan, dili gyud muobos sa tuhod ang gilawmon sa tubig baha nga maglunop sa ilang barangay

Sayo niini gisaad sa mga opisyal sa dakbayan nga ipatuman na sa dili madugay ang pagpatrabaho sa mga imbornal sa maong lugar. Ang Integrated Drainage Masterplan nga ipatuman sa unang quarter niining tuiga maoy gituohang makasulbad sa maong suliran nga dugay na kaayong gisagubang sa mga molupyo. (BANAT NEWS)