CEBU, Philippines - Daw usa ka klasikong panimawos ang gibuhat sa usa ka anak ngadto sa iyang madagmalong amahan human niya kini gitagod-tagod og tigbas sa tibuok lawas ug ulo pasado alas-2 sa miaging hapon sa sitio Cadlom barangay El Pardo lungsod sa Boljoon.
Ang biktima nga gihulagway ni SPO4 Cristino Uraca nga daw gi-‘chop-chop’ nailhan nga si Flavio Medel Viñan, 60, usa ka mag-uuma ug molupyo sa maong lugar samtang ang suspetsado nailhan usab nga si Saturnino Medico Viñan, 21, anak sa biktima.
Sa pakighinabi sa Banat News ni Uraca, ang desk officer sa Boljoon Police mibutyag kini nga base sa nakuha nga impormasyon sa iyang mga kaubanan nasayran nga ang kinamanghorang anak sa biktima nga si Asterio maoy unang nasayod sa maong panghitabo.
Sumala pa nga pag-abot ni Asterio sa ilang panimalay iyang nabantayan nga wala ang iyang amahan hinungdan nga iya kining gisusi ug iyang nakit-an ang iyang magulang nahinanok sa pagkatulog ug adunay gidulog nga sundang nga nagkadugo.
Tungod niini nakuyawan si Asterio hinungdan nga wala nalang niya kini pukawa ug mipadayon siya og pangita sa ilang amahan maong iyang giadto ang ilang baol apan mao nalay iyang kakugang nga ang iyang amahan nagbuy-od na nga naputos og mga samad tinigbasan sa kalawasan ug patay na.
Tungod niini mikaratil og dagan si Asterio ngadto sa lain pa niyang igsuon ug nangayo og tabang, gikan didto mikaratil usab sila dayun og adto sa panimalay sa ilang kapitan nga si Lorna Piloño diin midangop usab dayun ngadto sa ilang silingan nga polis nga si PO3 Reynaldo Rollon.
Si Rollon na maoy mitawag sa ilang estasyonan aron sa pagpangayo og pakitabang.
Sa pagresponde sa mga polis ilang naabtan ang suspek nga naghinuktok sa sulod sa ilang panimalay apan pagkabantay niini sa presensya sa mga polis giingong mihinay-hinay kini og kab-ot sa iyang sundang hinungdan nga daling gilayog sa mga polis.
Ang lawas sa biktima nagbuy-od sa gibana-banang 40 metros gikan sa ilang panimalay. Matud pa sa mga polis nga susama ra og gi ‘chop-chop’ ang biktima apan wala hinuon mangabuwag ang mga parte sa lawas niini.
Apan ang ulo niini daw nabuak sama sa lubi nga gituohang agi sa pagtigbas ug nagkawil nalang diha sa liog.
Matud pa ni Uraca nga base sa mga samad sa lawas agi sa tinigbasan mahulagway nila nga hilabihan ang kapungot sa suspetsado ngadto sa biktima.
Dihang gisukit-sukit ang suspek nasayran sa kapolisan nga niadtong bata pa kini mialegar kining grabe kaayong makapamunal kanila ang ilang amahan ug may higayon gyud nga naglisod na siya pagpagawas sa iyang hugaw tungod sa pagbunal kaniadto sa iyang amahan kaniya.
Gihulagway ni Uraca nga ang pagdumot nga gibati sa suspetsado ngadto sa iyang amahan maoy posibleng nagtukmod niini aron kini mabuhat ngadto sa amahan.
Sumala pa ni Uraca dihang ilang gipangutana ang suspek kun unsay iyang gibati sa iyang gibuhat kini miangkong nalipay siya sa gidangatan sa iyang amahan.
Kung ang suspek nalipay sa iyang gibuhat sukwahi hinuon ang gibati sa iyang mga igsuon ug mipadayag nga ilaha gyud kining pasakaan og kaso.
Ang kapolisan miandam na sa kasong parricide batok sa suspek. (BANAT NEWS)