Buto sa transformer nakapahadlok sa katawhan

CEBU, Philippines - Adunay mga tawong nangaligid sa karsada, ug mga bata nga napiit dihang ang mga tawo nga mikuyog sa prosisyon sa Santo Niño niadtong Sabado nagdinaganay dihang mibuto ang transformer sa kuryente duol sa Basilica pasado alas 5:00 sa hapon.

Duha sa mga deboto nga si Maria Fe Montalvo, 41, Barangay Health Worker sa barangay Umapad, dakbayan sa Mandaue ug ang upat ka buwan nga mabdos nga si An-an Angcos, 36, taga barangay Cogon, Pardo, dakbayan sa Sugbo nga nahinabi sa Banat News nagkanayon nga nagtuo sila og adunay bomba nga gipabuto hinungdan nga human sa sipang buto sa transformer sa kuryente diha duol sa Basilica ang mga tawo mialibwag og panagan ug nagsininggitay.

Matud sa duha nga dunay mga tawo ang nangaligid diha sa karsada unya aduna pay mga bata ang nangapiit atol sa dinaganay.

Ang ubang mga tawo misulod og mga tindahan nga nahimutang diha duol sa lugar sa Basilica ug maayo gani nga wala masuko ang mga tag-iya sa tindahan nga uban nilang mga baligya nangahagbong gikan sa estante.

Hinuon nakontrolar ra usab dayon ang maong problema ug walay gikatahong may nagrabehan.

Pipila ka minutos ang nakalabay laing transformer na usab sa kuryente ang mibuto dapit sa dalan F. Gonzales diin aduna pay daghang tawo diha sa maong lugar nga sumpay sa mikuyog sa prosisyon ug napawong ang mga suga sa maong dapit.

Busa ang uban mibiya sa prosisyon tungod sa kabalaka nga adunay mahitabong estampede kay may mga nagkuray na sa katugnaw.

Apan bisan og mibundak ang kusog nga uwan ug nagbaha ang karsada wala gihapon kini panumbalinga sa ubang deboto diin naghuot gihapon ang sulod sa Basilica uban kanila nagkugos og mga bata ug ang uban nagkugos sa imahen ni Santo Niño.

Si Col. Raymundo Bañares, Group Commander sa 7RCDG (Regional Community Defense Group) Army Reserve Command (ARESCOM) sa pakighinabi sa Banat News nagkanayon nga sa ilang area of responsibility sa dalan Osmeña Boulevard ug eskina Jokosalem ug Manalili uban usab ang mga Army, Philippine Army Reservist ug mga Reserve Officer Training Course (ROTC) gipangkatap sa maong lugar nga nagbantay sa bul-og sa mga tawo ug nagmentinar sa kahapsay ug kalinaw.

Matud ni Bañares nga mapasalamaton siya kang Santo Niño tungod kay malinawon ang sitwasyon sa pagpahigayon sa prosisyon hinuon dunay duha ka tawo ang miduol ngadto kanila nga mireklamo nga nawagtangan sa ilang mga cellular phone.

Matud ni Bañares nga sa iyang nakita diha sa ilang AOR mabantayan nga grabe ang bul-og sa mga tawo ug gituohan niyang labing midaghan ang mga tawo karong tuiga nga mitambong sa prosisyon itandi sa milabay’ng tuig diin siya maoy in-charge sa Task Force Sinulog. - BANAT NEWS