Director sa DENR nakigkita ni Gwen

CEBU, Philippines - Ang bag-ong Regional Director sa Department of Environment and Natural Resources (DENR) 7 miduaw sa buhatan ni Gobernador Gwendolyn Garcia sa miaging adlaw. 

Siya si kanhi director Maximo O. Dichoso, sa Rehiyon 10 sa Cagayan de Oro, kinsa mipasabot sa iyang kahinangop sa pakighimamat   kang Gobernador Garcia aron sa pagpahibawo nga siya na karon ang bag-ong regional director sa DENR 7.

Si Dichoso, nga maoy mihulip kang Regional Executive Director Leonardo R. Sibaluca, nagkanayon nga iyang nakita ang kamaayong pagdumala ni Garcia sa lalawigan sa Sugbo hinungdan ang iyang buhatan andam kaayong makigtambayayong sa probinsya sa Sugbo.

Kini ang hinungdan nga miduaw siya sa buhatan sa gobernador kay aron masabotan nila ang dugang pang kalamboan sa Cental Visayas ilabina sa lalawigan sa Sugbo.

Samtang gitataw ni Dichoso nga ipadayon gihapon niya ang mga nasugdan nga mga programa ni Director Leonardo R. Sibaluca

Dugang pa niya nga nasaksihan niya nga ang probinsya dako na og naangkon nga kalamboan itandi sa ubang probinsiya   sa nasud. - BANAT NEWS