CEBU, Philippines - Nawad-an og dakong kantidad nga salapi ang usa ka negosyanteng babaye human kini tulisa sa tulo ka wala hiilhing armadong mga lalaki nga nagsakay og motorsiklo didto sa sitio Datag, sa barangay Maribago, dakbayan sa Lapulapu.
Ang biktima mao si Cherry Mariquit Laboca, 43, minyo, nga taga Datag, ug maoy tag-iya sa Mariquit Marketing nga nahimutang sa nahisgotang dapit.
Sa imbestigasyon nga gihimo nila ni Inspector William Humoc, SPO2 Fridrect Islet sa Theft and Robbery sa kapolisan sa maong dakbayan nasayran nga usa sa tulo ka tawo nga nagsakay og motorsiklo maoy misulod sa tindahan sa biktima samtang ang duha ka mga kauban maoy nagsilbing look out.
Sa didto na sa sulod sa tindahan milanit kini sa armas de fuego ug wala makalihok ang biktima dihang mipahibawo kini nga tulis ug diha-diha gipupho ang katibuk-ang halin nianang adlawa gikan sa hunos nga balig P60,000 .
Matud pa ni Inspector Islet nga human masakiyo ang kuwarta yano kaayo kining migawas ug misakay sa nagpaabot nang motorsiklo uban sa duha niini kakauban.
Sa pagkakaron gipanid-an pa sa kapolisan ang maong mga tulisan. (BANAT NEWS)