Medellin nag-sesyon sa Capitol

CEBU, Philippines - Nagpahigayon sa ilang labing una nga out of town session ning tuiga ang mga opisyal sa lungsod sa Medellin didto sa legislative building sa Kapitolyo sa miaging buntag.

Si acting vice mayor Juan Alfonso Lim maoy nanguna sa maong session kay si Bise Mayor Micheal Miranda atua pa sa gawas sa nasud.

Matud ni Lim nga ang maong out of town session gituyo nila nga anha sa Kapitolyo himoa aron direkta nilang mapaabot ngadto sa mga local nga opisyal sa lalawigan ang ilang panginahanglan.

Usa sa ilang naaprobahan nga resolusyon sa maong session mao ang pagpangayo og hinabang pinansyal kanila ni bokal Joven Benjun Mondigo, Bokal Sun Shimura sa kwarto distrito ug ABC Federation President Joey Boy Holganza ug ni Kongresista Benhur Salimbangon nga pulos taga kwatro distrito.

Matud ni Lim nga ang gahin nga ilang mapangayo sa ilang mga opisyal sa distrito gamiton nila pagtubag sa panginahanglan sa gipahigayong Medellin Secondary Schools Athletic Association League.

 Ang mayor sa maong lungsod Ricky Ramirez nasentro karon sa kontrobersya human kini pasanginli nga miunay og pusil patay sa kawani niini sa lungsod nga si Edelberto Abao. (BANAT NEWS)