CEBU, Philippines - Mokabat sa 5,000 ka mga bata gikan sa 22 ka barangay sa dakbayan sa Talisay ang nakapahimulos sa gipahigayong mass feeding sa siyudad atol sa kasaulogan sa ika-napulo nga Charter Day sa Talisay niadtong Enero 12, 2011.
Ang nahisgutang mga bata nga nakabenipisyo sa simultaneous mass feeding giila sila sa mga Barangay Nutrition Scholar (BNS).
Gawas sa mga sustansiyadong pagkaon nga giandam sa mga sakop sa BNS, ang mga department head sa city hall ug ang mga sakop sa konseho sa kabarangayan mipahigayon og monitoring ug lecture ngadto sa mga ginikanan sa kabataan kabahin sa hustong nutrisyon sa ilang mga anak.
Sa milabay’ng mga tuig nasuta sa Talisay City Health Office nga adunay mga kabataan sa siyudad nga mga malnourish o kuwang sa pagkaon ug bitokon hinungdan nga ang kagamhanan sa siyudad mipahigayon og pagpamorga sa mga bata ug nagpakaon usab kanila.
Ang mass feeding maoy usa sa highlight kon dakong bahin sa pagsaulog sa Talisay Charter Day .
Sa barangay Biasong 100 ka mga bata ang nakaambit sa mass feeding, 300 sa Bulacao, 100 sa Camp 4, 200 sa Candulawan, 300 sa Cansojong, 200 sa Dumlog, 200 sa Jaclupan, 300 sa Lagtang, 200 sa Lawaan I, 200 usab sa Lawaan II, 300 sa Lawaan III, 200 sa Linao, 100 sa Maghaway, 100 usab sa Manipis, 200 sa Mohon, 300 sa Poblacion, 200 sa Pooc, 300 sa San Isidro, 300 sa San Roque, 300 sa Tabunok, 300 sa Tanke ug 100 sa Tapul. (BANAT NEWS)